Hafn­ir

Vegagerðin rekur upplýsingakerfið sjolag.is. Þar eru birtar veðurupplýsingar frá veðurstöðvum staðsettum í völdum vitum og upplýsingar frá öldumælum fyrir sjólag frá 11 öldumælum sem staðsettir eru hringinn í kringum landið.

Verkefni hafna- og strandrannsókna skiptast í nokkra flokka. Hér fyrir neðan má sjá hvernig nýleg verkefni skipast í þessa flokka.

• Verkefni tengd breytingum á höfnum, stækkunum hafna og áhrifum þeirra á kyrrð við kanta og fleira.
• Vöktun, greining og spá á veðurfari á sjó. Undir þennan flokk falla uppfærsla á vefnum Veður og sjólag; sjávarborðsmælingar í höfnum; skoðun og greining á undangengnum flóðaveðrum; öldukort og líkindadreifing öldu á hafi; auk uppfærslu á hugbúnaði fyrir öldufarsreikninga og hreyfingu skipa við kant.
• Varnir gegn náttúruvá:  skoðun á sandflutningum og landrofi, viðmiðunarreglur Vegagerðarinnar fyrir landhæð á lágsvæðum og ákvörðun á lágmarkslandhæð, ölduspá og skoðun á flóðum.
• Rannsóknarverkefni tengd hafnarmannvirkjum og hönnun þeirra eru meðal annars jarðtæknirannsóknir og skoðun á rafvæðingu hafna.
• Rannsóknar- og þróunarverkefni, s.s. greining á sjávarflóðum til ákvörðunar á lágmarksgólfhæð húsa við strendur. (lágsvæði)

Vegagerðin fer með stjórn hafnabótasjóðs. Sjóðurinn fjármagnar ríkisstyrktar framkvæmdir og tjónaviðgerðir.

• Hafnabótasjóður fjármagnar framkvæmdir samkvæmt samgönguáætlun sem samþykkt hefur verið á Alþingi.
• Sjóðurinn starfrækir þróunardeild hafna sem hefur það markmið að styðja minni hafnir á landsbyggðinni sem eru mikilvægar fyrir byggðarlagið og atvinnuuppbyggingu þess.
• Sjóðurinn bætir tjón á hafnarmannvirkjum sem eru styrkhæf og þau tjón sem ekki fást að fullu bætt úr viðlagasjóði eða vegna ákvæða siglingalaga um takmarkaða ábyrgð útgerðarmanna.
• Sjóvarnir eru varnir gegn sjávarflóðum og landbroti af völdum ágangs sjávar. Byggð svæði og svæði þar sem til staðar eru dýrmæt mannvirki eða menningarminjar skulu að jafnaði njóta forgangs við gerð sjóvarna.