PDF · Útgáfa 06152 — apríl 2007Nýtt umferðarlíkan höfuðborgarsvæðisins – umferðarspá 2024 (framhald rannsóknaverkefnis frá 2005)
Það verkefni sem hér eru gerð skil, er unnið í beinu framhaldi af rannsóknarverkefninu “Nýtt umferðarlíkan höfuðborgarsvæðisins” frá febrúar 2006. Í
verkefninu er gerð umferðarspá fyrir árið 2024. Sömu aðferðum er beitt í því og voru staðfestar og sannreyndar 2006 en auk þess er beitt Pivot aðferð (Pivot-point procedure) til að jafna út skekkjur í framtíðarspám. Ennfremur var ráðgert að kanna hvort hægt væri að nota í líkaninu fjölda starfa í stað fermetra atvinnuhúsnæðis. Þar sem mun meiri tíma tók að nota Pivot aðferðina en ráðgert hafði verið, var ákveðið að minnka vægi þessa þáttar í verkefninu og sótt um framhaldsverkefni í febrúar 2007 til að halda áfram með þennan hluta. Gert er ráð fyrir að honum ljúki í desember 2007.
Framtíðargatnanet var yfirfarið og uppfært í samvinnu við Framkvæmdasvið Reykjavíkurborgar, Hafnarfjörð og Mosfellsbæ. Skipulagstölur fyrir árið 2024 voru einnig yfirfarnar og uppfærðar að hluta til af Skipulags- og byggingarsviði Reykjavíkurborgar.
Helstu niðurstöður
Í þessu verkefni hefur verið unnin framtíðarspá með þeim aðferðum sem lagt var til í niðurstöðum verkefnisins “Nýtt umferðarlíkan höfuðborgarsvæðisins” frá febrúar 2006. Stór hluti verkefnisins fór í að beita Pivot aðferð á umferðarspána til að fá raunhæfara umferðarflæði fyrir árið 2024. Þegar spáð er fyrir grunnári er alltaf hægt að taka mið af umferðartalningum sem gefa hugmynd um áreiðanleikann en í framtíðarspám vantar hinsvegar viðmið af því tagi. Taflan fyrri neðan sýnir dæmi um rýni á niðurstöðum, teknar voru fyrir svokallaðar sniðtalningar á öllu höfuðborgarsvæðinu og borið saman niðurstöður frá árinu 2004 (talningar, mat og spá) við spá fyrir 2024 með og án
notkunar Pivot aðferðarinnar.
