PDF · september 2009Alvarleg umferðarslys á höfuðborgarsvæðinu
Undanfarin ár hefur umferðarslysum, þar sem einn eða fleiri aðilar hljóta mikil meiðsli, fjölgað. Árið 2006 voru þessi slys 54 en 70 árið 2008. Sambærileg aukning hefur orðið á alvarlegum umferðarslysum í þéttbýliskjörnum utan höfuðborgarsvæðisins.
Útafakstur er algengasta tegund alvarlegra umferðarslysa en þessi slys eiga sér stað að mestu í dreifbýli. Árekstrar bifreiða eru hins vegar algengari tegund alvarlegra umferðaslysa í þéttbýli. Af þessum 70 slysum voru 25 árekstrar bifreiða. Sjö af hverjum tíu þeirra áttu sér stað á gatnamótum. Algengasta orsök þessara slysa er að ökumaður sýnir ekki nægjanlega aðgát við akstur. Næst á eftir kemur svo sú ástæða að ökumaður sýnir af sér vítavert gáleysi sökum ölvunar eða lyfja.
Alls hlutu 18 gangandi vegfarendur mikil meiðsli á höfuðborgarsvæðinu árið 2008. Fimm slysanna áttu sér stað á gangbraut, níu á akbraut og þrjú á bílastæði. Eitt slys gerðist á gangstétt. Flestir hinna slösuðu voru 55 ára eða eldri. Orsakir þessara slysa skiptist nokkuð jafnt milli ökumanna og hinna gangandi vegfarenda. Í um helmingi tilfella má rekja slys til þess að gangandi vegfarandi gekk inn á akbraut í veg fyrir bifreið. Hinn helminginn má rekja til aðgæsluleysis ökumanns.
Í átta af 14 alvarlegum bifhjólaslysum missti ökumaður bifhjóls stjórn á hjólinu og féll í götuna, bifreið ók í veg fyrir bifhjól í fjórum slysanna og í tveimur var bifhjóli ekið aftan á bifreið. Algengustu meiðslin í þessum slysum var viðbeins- og handleggsbrot.
Í skýrslunni koma fram tillögur til úrbóta, nefndin leggur meðal annars til að ökumenn bifhjóla stundi reglubundið æfingar á viðbrögðum við óvæntum aðstæðum í umferðinni, haldið verði áfram á þeirri braut að aðgreina umferð óvarinna vegfarenda og umferð ökutækja og einfalda og bæta umferðarmikil gatnamót.
