25. mars 2025Vegagerðin kaupir Gömlu Þingborg
Vegagerðin hefur fest kaup á Gömlu Þingborg, sem stendur við Hringveg (1) austan Selfoss. Kaupverðið er 72,5 milljónir. Ástæða kaupanna er sú að húsið stendur innan veghelgunarsvæðis núverandi Hringvegar og í væntanlegu framtíðarvegstæði Hringvegar. Fyrirhuguð er framkvæmd við breikkun Hringvegar frá Selfossi og allt að Markarfljóti í nokkrum áföngum.
Verkefnið er áætlað á öðru og þriðja tímabili ósamþykktrar samgönguáætlunar 2029-2038. Sem liður í þeim áætlunum var ákveðið að kaupa Þingborg þegar ljóst var að sveitarfélagið Flóahreppur hafði ákveðið að setja húsið á sölu.
Vinna við undirbúning fyrsta hluta þessarar framkvæmdar er hafin hjá Vegagerðinni. Á næstu árum mun því húsið þurfa að víkja fyrir umbótum á samgöngumannvirkjum sem bæta þannig samgöngur og umferðaröryggi á þessu svæði.
Vegagerðin mun leitast við að eiga í góðum samskiptum við þá leigjendur sem nýta húsið. Vegagerðin gengur inn í fyrirliggjandi samninga eins og eðlilegt er.
Fyrirhugað er að breikka Hringveg frá Selfossi og allt að Markarfljóti.
Húsið stendur innan núverandi veghelgunarsvæðis.