16. júlí 2024

Gert við göngu­brú við Eski­fell í Lóni

Göngubrúin yfir Jökulsá í Lóni við Eskifell er ein sú lengsta á landinu, 95 m löng. Hún var byggð af starfsmönnum Vegagerðarinnar árið 2004. Brúin skemmdist töluvert í óveðrinu sem gekk yfir Austurland í lok september 2022. Strax um haustið var farið í bráðabirgðaviðgerðir.

Það var svo í lok júní á þessu ári sem starfsmenn verktaka á vegum Vegagerðarinnar gengu frá styrkingum og kláruðu viðgerðir á göngubrúnni við Eskifell. Skipt var um og lagfærðar sjö hengistangir, skipt um vindstífingarkrossa undir gólfi, gengið frá betri festingum á handriðsvírum auk þess sem allir gólfplankar voru endurskrúfaðir og samskeyti stálbita hert og yfirfarin. Einnig var múrað í skemmdir á stöplum og gengið frá rampi upp á gólfið í báðum endum.

Mjög vinsælt er að ganga um Lónsöræfi enda svæðið rómað fyrir margbreytileika og fegurð. Brýrnar í Eskifelli og Kollumúla eru mikilvægir samgönguinnviðir sem greiða för göngufólks.