14. mars 2025

Vinnu­lýsing mikil­væg á fram­kvæmda­svæði við Reykja­nesbraut

Til að mæta óhefðbundnum aðstæðum sem vinnusvæði hafa í för með sér þarf að grípa til ýmissa ráðstafana til að auka öryggi bæði starfsfólks og vegfarenda. Aukin lýsing er eitt, en einnig er hraði lækkaður verulega. Þrátt fyrir hraðatakmarkanir hefur illa gengið að hægja á umferð fram hjá framkvæmdasvæðinu á Reykjanesbraut. Einnig eru settar upp vinnusvæðamerkingar sem reglulega eru teknar út auk þess sem skilti eru þrifin eins og þörf er á.

Breytingar gerðar á vörnum eftir alvarlegt slys

Eftir alvarlegt bílslys sem varð á vinnusvæðinu í vetur þar sem ökutæki úr gagnstæðri átt skullu saman, voru akreinar aðskildar með þungum vörnum og settar steinblokkir milli akreina. Reglur miða við að slíkt sé ekki gert á vinnusvæðum þar sem hraði er tekinn niður í 30 km/klst. og því var þetta ekki gert í upphafi framkvæmda.

Gatnalýsing og almennt ástand Reykjanesbrautar

Þegar lýsing var sett upp við Reykjanesbraut á sínum tíma  var miðað við þau viðmið sem giltu þá og þær fjárveitingar sem úr var að spila. Í dag gilda önnur viðmið og því er stuðst við nýjustu staðla í lýsingu við þessa nýframkvæmd.

Bent hefur verið á að stikur vanti meðfram Reykjanesbraut og yfirborðsmerkingar séu máðar. Yfir vetrartímann er alltaf nokkuð um að stikur verði fyrir hnjaski, meðal annars vegna snjóruðnings. Reynt er að bregðast við því jafnóðum en á vorin og sumrin er  unnið markvisst að því að laga vegbúnað á vegakerfinu. Yfirboðsmerkingar eru endurnýjaðar reglulega en víða, þar sem álag er mikið vegna umferðar og snjómoksturs, þarf að endurnýja yfirborðsmerkingar á hverju vori. Ekki er hægt að merkja yfirborð yfir vetrartímann og því er það gert yfir sumartímann. Ekki eru alltaf til fjárveitingar til að merkja allt sem er illa farið og þarfnast endurmerkinga og því eru merkingar stundum ófullnægjandi lengur en æskilegt væri.

Á umferðarþungum vegum eins og Reykjanesbrautinni verður óhjákvæmilega slit á malbiki. Farið er í varanlegar viðgerðir að vori þegar veður og aðstæður leyfa og þá helst holuviðgerðir og annað sem við á. Yfir vetrartímann er sinnt holufyllingum við bráðaskemmdum.

Vegagerðin reynir að halda í horfinu í viðhaldi vega en eins og víða annars staðar á landinu er viðhaldsþörfin orðin mikil og skortur á viðhaldsfé tilfinnanlegur. Ljóst er að auka þarf verulega fjármuni til viðhalds vega eins og berlega hefur komið í ljós undanfarin ár og vakin hefur verið athygli á.