31. júlí 2024Viðgerðum á Gullinbrú að ljúka
Viðhaldsvinna við Gullinbrú er á lokametrunum en viðgerðir hafa staðið yfir frá því í lok júní. Brúarvinnuflokkur Vegagerðarinnar í samstarfi við Freyssinet sá um framkvæmdirnar.
Um er að ræða nokkuð flóknar framkvæmdir. Helstu verk voru að fjarlægja klæðningu úr corten-stáli af brúnni. Stálið var orðið mjög ryðgað og hætta var á því að hlutar þess tækju að hrynja niður á göngu- og hjólastíg fyrir neðan brúna með tilheyrandi hættu fyrir gangandi og hjólandi vegfarendur.
Einnig voru þensluraufar á slitlagsyfirborði endurbyggðar og smávægilegum steypuviðgerðum sinnt. Þá er búið að hreinsa og laga niðurföll og festa upp ídráttarrör fyrir rafstreng, auk nokkurra smáverka.
Framkvæmdir gengu vel.
Frá Gullinbrú.