20. mars 2026

Úthlut­un úr Rann­sókna­sjóði Vega­gerðar­innar fyrir árið 2026

Rannsóknasjóður Vegagerðarinnar gegnir mikilvægu hlutverki í að styðja við nýsköpun og þróunarstarf á fagsviðum stofnunarinnar. Með sjóðnum er stuðlað að hagnýtum rannsóknum sem nýtast beint í verkefnum Vegagerðarinnar og efla þekkingu á sviði mannvirkja, umferðar, umhverfis og samfélags.

Dr. Ólafur Sveinn Haraldsson, forstöðumaður rannsóknadeildar Vegagerðarinnar, segist vera ánægður sem fyrr með niðurstöðu úthlutunar í ár. „Umsóknirnar voru fjölbreyttar og endurspegla vel þau fjölbreyttu viðfangsefni sem Vegagerðin stendur frammi fyrir. Rannsóknasjóðurinn er lykilverkfæri til að styðja við nýsköpun og þróun í okkar starfsemi,“ segir hann.

Verkefnin sem hlutu styrk í ár tengjast ýmsum þáttum starfsemi Vegagerðarinnar. Rannsóknum Vegagerðarinnar er skipt í fjóra flokka: mannvirki, umferð og umferðaröryggi, umhverfi og samfélag. Flokkunin endurspeglar breiddina í starfsemi Vegagerðarinnar og mikilvægi þess að þróa þekkingu á öllum sviðum.

Samþykktar umsóknir skiptust þannig:

• Vegagerðin: 10 umsóknir – samtals 20,5 m.kr.
• Verkfræðistofur: 20 umsóknir – samtals 55,3 m.kr.
• Háskólar og tengdar stofnanir: 19 umsóknir – samtals 35,5 m.kr.
• Opinberar stofnanir og fyrirtæki: 5 umsóknir – samtals 17,7 m.kr.
• Aðrir: 9 umsóknir – samtals 21,0 m.kr.

Umsækjendur og verkefnisstjórar hafa fengið send skeyti um samþykkt eða synjun en upplýsingar um verkefni sem fengu styrk verða birtar á vef Vegagerðarinnar innan skamms.