13. desember 2021Snæfellsnesvegur (54), Ketilsstaðir – Gunnarsstaðir – undirskrift
Vegagerðin og Borgarverk hafa skrifað undir samning um framkvæmd við verkið Snæfellsnesvegur (54), Ketilsstaðir – Gunnarsstaðir. Verkið felst í endurbyggingu Snæfellsnesvegar á um 5,4 km kafla. Innifalið í verkinu er bygging tveggja brúa á Skraumu og Dunká.
Vegurinn er að mestu endurbyggður í vegstæði núverandi vegar með nokkrum lagfæringum.
Brúin á Skraumu verður 43 m löng í þremur höfum, byggð upp af samverkandi stálbitum og steyptu brúardekki. Milliundirstöður eru tvær hallandi stálsúlur í hvorri undirstöðulínu með stífandi krossum á milli.
Brúin á Dunká verður 52 m löng staðsteypt uppspennt plötubrú í tveimur höfum. Milliundirstaðan er lóðrétt staðsteypt súla. Hún munu standa á steyptri undirstöðu sem grunduð er á klöpp vestan megin við megin rennsli árinnar, þar sem klöpp liggur ofan árfarvegarins.
Gert er ráð fyrir að í flóðum eða klakahlaupum geti vatn og ís náð upp á súlur brúanna án þess að valda skaða.
Verktaki hefur undirbúning framkvæmda fljótlega, framkvæmdir hefjast í mars 2022 en gert er ráð fyrir að verkinu sé að fullu lokið sumarið 2023.
Pálmi Þór Sævarsson svæðisstjóri Vestursvæðis Vegagerðarinnar og Óskar Sigvaldason framkvæmdastjóri Borgarverks ehf. við undirritun samnings.
Brú yfir Skraumu verður 43 m. löng.