10. maí 2022Skrifað undir verksamning vegna vegagerðar um Teigsskóg
Bergþóra Þorkelsdóttir forstjóri Vegagerðarinnar og Óskar Sigvaldason framkvæmdastjóri Borgarverks skrifuðu undir verksamning í húsakynnum Vegagerðarinnar 10. maí. Verkið snýst um vegalagningu frá þverun Þorskafjarðar að vegamótum við Djúpafjörð m.a. um Teigsskóg. Kaflinn er um 10 km og verkinu á að vera lokið síðsumars á næsta ári.
„Það er verulega gleðilegt að skrifa undir þennan verksamning,“ sagði Bergþóra við undirskriftina. „Þetta er gríðarlegur góður áfangi að koma þessu af stað, en kaflinn um í Gufudalssveitinni hefur verið flöskuháls fyrir byggðarlögin á sunnanverðum Vestfjörðum.“ Óskar sagði að Borgarverk myndi hefjast handa þann 24. maí og að byrjað yrði á því að koma sér fyrir. „Okkur líst vel á þetta verk og búumst ekki við neinum deilum, ekki núna þegar búið er að taka ákvörðun um vegagerðina,“ sagði Óskar. „Ég á ekki von á öðru en góðri samvinnu við heimamenn. Þetta er spennandi verkefni.“
Borgarverk átti lægsta tilboðið sem hljóðaði upp á 1.235 m.kr. eða ríflega 86 prósent af kostnaðaráætlun. Sjá niðurstöðu útboðs .
Verkið felst í nýbyggingu Vestfjarðavegar á um 10,4 km kafla, milli stöðva 4.400 og 14.800.
Vegurinn er að alfarið byggður í nýju vegstæði en tengist núverandi Vestfjarðavegi í annan endann. Í verkinu felst einnig nýbygging Djúpadalsvegar á um 0,2 km kafla, milli stöðva 0 og 210. Vegurinn er alfarið byggður í nýju vegstæði en tengist nýjum Vestfjarðavegi í annan endann og nýjum Djúpadalsvegi sem er í byggingu í hinn endann.
Útlögn efra lags klæðingar skal lokið 15. ágúst 2023.
Verkinu skal að fullu lokið 15. október 2023.
Vegstæði um Teigsskóg
Undirskrift vegagerð um Teigsskóg