13. nóvember 2024Morgunfundur um umferðarmál á höfuðborgarsvæðinu
Þú ert umferðin – Þróun samgangna á höfuðborgarsvæðinu er yfirskrift morgunfundar Vegagerðarinnar, sem haldinn verður fimmtudaginn 14. nóvember frá kl. 9:00-10:30 í Suðurhrauni 3 og í beinu streymi.
Til umfjöllunar verður þróun byggðar og samgangna síðustu ár og hvar helsta uppbygging og fólksfjölgun hefur verið á höfuðborgarsvæðinu. Skoðað verður hvernig það hefur haft áhrif á umferð bíla á þessu tímabili. Farið verður yfir samanburð á milli landa á ferðatíma í sambærilegum borgum og höfuðborgarsvæðið. Þá verður sagt frá niðurstöðum rannsóknar á ferðavenjum í blandaðri byggð. Að lokum verður farið yfir innstig í strætó á höfuðborgarsvæðinu síðastliðin ár og leiðina í átt að Nýju leiðaneti.
Dagskrá:
Þróun byggðar og samgangna á höfuðborgarsvæðinu
Cecilía Þórðardóttir, samgönguverkfræðingur og verkefnastjóri hjá Vegagerðinni
Fjallað verður um þróun byggðar og samgangna síðustu ár og farið yfir hvar helsta uppbygging og fólksfjölgun hefur verið á höfuðborgarsvæðinu. Skoðað verður hvernig það hefur haft áhrif á umferð bíla á þessu tímabili. Niðurstöður Ferðavenjukönnunar 2022 verður stuttlega til skoðunar og hún tengd við ferðamyndun í dag.
Umferðin í tölum – samanburður milli landa
Berglind Hallgrímsdóttir, samgönguverkfræðingur Ph.D. hjá EFLU
Farið verður yfir samanburð milli landa, hverjar meðaltafir eru í sambærilegum borgum og höfuðborgarsvæðið. Greiningarnar eru unnar út frá fljótandi ökutækjagögnum (TomTom) og sýna meðalferðatíma og meðalhraða á og utan háannatíma í nokkrum borgum á Norðurlöndunum.
Umferðin í tölum – ferðatími á höfuðborgarsvæðinu
Cecilía Þórðardóttir, samgönguverkfræðingur og verkefnastjóri hjá Vegagerðinni
Ferðatími á annatímum árdegis og síðdegis á höfuðborgarsvæðinu verður til umfjöllunar. Skoðaðar verða nokkrar leiðir milli íbúasvæða og helstu atvinnu- og menntasvæða.
Ferðavenjur í blandaðri byggð
Albert Skarphéðinsson, verkfræðingur hjá EFLU
Farið yfir niðurstöður rannsóknar á áhrifum blandaðrar byggðar á ferðamyndun.
Innstig í strætó á höfuðborgarsvæðinu síðastliðin ár og leiðin í átt að Nýju leiðaneti
Valgerður Gréta Benediktsdóttir, MSc í skipulagsfræði og samgöngusérfræðingur hjá Strætó
Fjallað verður um annars vegar þróun í fjölda farþega (fjöldi innstiga) almenningssamgangna á höfuðborgarsvæðinu síðustu ár og hins vegar aukna þjónustu á næstu árum með auknu fjármagni samanber uppfærðan Samgöngusáttmála höfuðborgarsvæðisins.
Fundarstjóri: Bryndís Friðriksdóttir, svæðisstjóri Höfuðborgarsvæðis Vegagerðarinnar.
Öll eru velkomin á meðan húsrúm leyfir.
Vesturlandsvegur í gegnum Mosfellsbæ: Sá kafli sem er milli Skarhólabrautar og Hafravatnsvegar.
Miklabraut eins og hún lítur út í dag.