7. maí 2024

Mikil aukn­ing umferðar á höfuð­borgar­svæð­inu í apríl

Milli mánaða 2023 og 2024
Mjög mikil umferð var á höfuðborgarsvæðinu í nýliðnum apríl og mældist hún rúmlega 12% meiri en í sama mánuði fyrir ári síðan. Öll mælisniðin þrjú hækkuðu um tveggja stafa tölu, sem er fáséð en sem þó er helst að vænta í mars og apríl; og þá í kringum páska.

Mælisnið ofan Ártúnsbrekku jókst mest eða um rúmlega 15% en hin tvö sniðin, við Kópavogslæk og Dalveg, jukust um 11%.

Allt þetta leiddi til þess að nýtt umferðarmet var slegið í apríl á höfuðborgarsvæðinu. Aldrei áður hafa fleiri ökutæki farið yfir mælisniðin þrjú í apríl mánuði.

Frá áramótum
Núna hefur umferðin aukist um 5% frá áramótum, fyrir lykil mælisniðin þrjú.  Þessi aukning er aðeins minni en á síðasta ári, á sama tíma, en þá hafði umferðin aukist um 7,3%.

Umferð eftir vikudögum í apríl
Mest var ekið á föstudögum, í nýliðnum mánuði, en minnst á sunnudögum.  Umferðin á virkum er þó mjög svipuð, það er helst að mánudagar skeri sig úr, en helgarumferð er yfirleitt talsvert minni en á virkum dögum á höfuðborgarsvæðinu.

Mest jókst umferð á föstudögum, borið saman við sama mánuð á síðasta ári, og minnst á mánudögum.

Horfur út árið 2024
Samkvæmt reiknilíkani umferðardeildar gæti umferðin aukist um tæp 5% á þessu ári, miðað við síðasta ár.  Reiknilíkanið spáir því heldur minni aukningu en er á Hringvegi (7,5%).

Samkvæmt rannsóknum Vegagerðarinnar hefur reynst mjög mikil fylgni milli hagvaxtar og umferðar á höfuðborgarsvæðinu. Með það í huga kunna þessar umferðarspár (á höfuðborgarsvæði og Hringvegi) að vera í hærri kantinum gangi hagvaxtarspár Hagstofu og Seðlabanka eftir. Það verður því afar fróðlegt að fylgjast með hvernig umferðarþróunin verður næstu mánuði.