11. september 2020

Dynj­andis­heið­in – skrif­að undir verk­samn­ing

Um er að ræða verkið Vestfjarðavegur (60) um Dynjandisheiði, 1. áfangi og felst það í nýbyggingu Vestfjarðarvegar á um 10 km kafla. Verkið skiptist í tvo kafla. Annars vegar um 5,7 km langan kafla við Þverdalsá (vegkafli 60-35) og hins vegar um 4,3 km langan kafla fyrir Meðalnes (vegkafli 60-38). Vegurinn við Þverdalsá er að mestu leyti byggður í nýju vegstæði en að hluta til í núverandi vegstæði og liggur svo niður Penningsdalinn. Vegurinn fyrir Meðalnes er alfarið byggður í nýju vegstæði. Þverdalsáin rennur í Vatnsfjörð í Pennudal – ofan við Flókalund  en Meðalnesið er innst í Arnarfirði þar sem er Borgarfjörður og kaflinn byrjar nálægt Mjólkárvirkjun.

Við undirskrift samningsins sagði Sigurður Ragnarsson forstjóri ÍAV hf. að honum litist mjög vel á þetta verk og þar sem hann hefði nýverið ekið þessa leið myndi hann fagna því að geta í framtíðinni ekið þar um á hreinum bíl. Bergþóra Þorkelsdóttir forstjóri Vegagerðarinnar sagði að ánægjulegt væri að hægt væri að fara í vegalagningu um Dynjandisheiði um leið lokið væri við gerð Dýrafjarðarganga en á tímabili var þessi vegagerð ekki áætluð fyrr en nokkuð seinna. Það mun því fela í sér að fjárfestingin í göngunum mun nýtast betur mun fyrr en ella.

Unnið verður við verkið í allan vetur ef aðstæður leyfa en samkvæmt verkáætlun á útlögn efra lags klæðingar að vera lokið 31. ágúst 2021. Verkinu skal síðan að fullu vera lokið 30. september 2021.

Auk forstjóranna Bergþóru Þorkelsdóttur og Sigurðar Ragnarssonar má sjá á neðstu myndinni þá Hauk Magnússon og Einar Hrafn Hjálmarsson frá ÍAV og Gunnar Sigurgeirsson og Sigurþór Guðmundsson frá Vegagerðinni.