Mínar síður

10. september 2024
50 ár frá opnun Hringvegar – upptökur af málþingi og ávörpum

Vegagerðin og sveitarfélagið Hornafjörður stóðu fyrir málþingi og hátíðahöldum þann 30. ágúst 2024 í tilefni af 50 ára afmæli Hringvegarins. Í júlí 1974 var Skeiðarárbrú, lengsta brú landsins, vígð á 1100 ára afmæli Íslandsbyggðar. Bygging brúarinnar þótti verkfræðilegt þrekvirki á sínum tíma. Með henni var lokið við Hringveginn sem eftir það tengdi byggðirnar umhverfis Ísland í samfellda heild.

Málþingið, sem fór fram í félagsheimilinu Hofgarði að Hofi í Öræfum, var afar vel sótt, en um 120 manns þáðu kjötsúpu og hlustuðu á erindin. Frummælendur voru fjórir. Rögnvaldur Gunnarsson, fyrrverandi forstöðumaður framkvæmdadeildar Vegagerðarinnar, sagði frá minningum sínum af framkvæmdunum við Skeiðarárbrú. Guðmundur Valur Guðmundsson, framkvæmdastjóri þróunarsviðs Vegagerðarinnar, greindi frá þeim áskorunum sem síbreytilegur Skeiðarársandurinn hefur verið fyrir vegagerð og horfði einnig til framtíðar. Svanhvít Helga Jóhannsdóttir, leiðsögumaður og fjallamennskukennari, frá Svínafelli, las hluta úr sögu Þórbergs Þórðarsonar; Vatnadagurinn mikli, sem segir frá ævintýralegri ferð yfir Skeiðará. Hallgrímur Helgason hélt líflega ræðu um líf og störf föður síns, Helga Hallgrímssonar, sem var yfirverkfræðingur á þeim tíma sem brúin var byggð og síðar vegamálastjóri.

Fundarstjóri var Borgþór Arngrímsson.

Hér að neðan má sjá upptökur af öllum erindunum af málþinginu.

Þátttakendur í málþinginu. Sigurjón Andrésson, Jón S. Bjarnason harmonikuleikari, Bergþóra Þorkelsdóttir, Svanhvít Helga Jóhannsdóttir, Hallgrímur Helgason, Guðmundur Valur Guðmundsson, Borgþór Arngrímsson og Rögnvaldur Gunnarsson.

Um 120 manns mættu á málþingið í félagsheimilinu Hofgarði.

Hátíð á Skeiðarársandi

Að loknu málþinginu var haldið að vesturenda gömlu Skeiðarárbrúarinnar þar sem haldin var hátíð í tilefni af hálfrar aldar afmæli brúarinnar og Hringvegarins.

Fjögur fluttu ávörp við tilefnið. Bergþóra Þorkelsdóttir, forstjóri Vegagerðarinnar, lýsti vel hátíðarhöldunum fyrir fimmtíu árum. Sigurjón Andrésson, bæjarstjóri sveitarfélagsins Hornafjarðar fagnaði tímamótunum og hvatti ráðamenn áfram til dáða varðandi frekari samgöngubætur. Pálína Þorsteinsdóttir frá Svínafelli í Öræfum, dóttir Þorsteins Jóhannssonar (1918-1998), bónda, skálds og vegavinnuverkstjóra rifjaði upp æskuminningar frá þeim tíma sem Skeiðarárbrú var í byggingu. Gunnþóra Gunnarsdóttir frá Hnappavöllum í Öræfum fór með ljóð eftir Þorstein frá Svínafelli.

Að loknum ávörpum söng Öræfingakórinn nokkur lög og að því loknu var gengið upp á brúna með lúðrasveit Hornafjarðar í fararbroddi. Að lokum var boðið upp á hressingu undir brúnni og klifurfélag Öræfinga sýndi listir sínar.

Upptökur af ávörpunum er að finna hér að neðan.