2. apríl 2026Nauðsynleg framkvæmd til að tryggja öryggi í Hvalfjarðargöngum
Vegna nauðsynlegrar endurnýjunar á lýsingu í Hvalfjarðargöngum verða göngin lokuð á kvöldin frá kl. 21:30 til kl. 06:00, frá sunnudagskvöldum til föstudagsmorgna, á tímabilinu 7. apríl til 29. maí. Framkvæmdin er liður í því að tryggja öryggi vegfarenda og uppfæra mikilvæga innviði í samræmi við nútímakröfur.
Ljóst er að lokanirnar munu hafa áhrif á umferð, en þær eru óhjákvæmilegar til að unnt sé að framkvæma verkið með fullnægjandi öryggi.
Úreltur lýsingarbúnaður
Núverandi lýsing í Hvalfjarðargöngum hefur verið í notkun frá opnun þeirra. Framleiðslu á perum fyrir þann búnað hefur nú verið hætt og birgðir að klárast. Með aukinni umferð um göngin er orðið brýnt að ráðast í heildaruppfærslu á lýsingunni, svo hún uppfylli nútímakröfur og tryggi sem best öryggi allra vegfarenda.
Unnið á nóttunni
Framkvæmdin er umfangsmikil og af öryggisástæðum er ekki hægt að vinna verkið meðan göngin eru opin fyrir umferð. Því er nauðsynlegt að loka þeim á kvöldin til að hægt sé að vinna verkið á skilvirkan og öruggan hátt án hættu fyrir starfsfólk eða ökumenn. Með því að vinna verkið á nóttunni er reynt að lágmarka áhrif á daglega umferð eins og kostur er.
Bætt öryggi og betri orkunýting
Í framkvæmdinni verður eldri búnaður fjarlægður og settir upp nýir, dimmanlegir LED-lampar sem uppfylla kröfur um lýsingu og öryggi í jarðgöngum. Með þessari uppfærslu verður lýsing í göngunum bæði betri og orkunýtnari.