Vega­gerð­in í nærmynd

Páll Birgir Jónsson

Þegar Páll Birgir Jónsson sá auglýst starf hjá Vegagerðinni hjá Austursvæði síðastliðið haust ákvað hann að slá til. Eftir fjölmörg gefandi ár hjá Alcoa var hann tilbúinn fyrir nýjar áskoranir og starf þar sem verkefnin hafa raunverulegt gildi fyrir samfélagið í heild.

„Það sem mér fannst hvað áhugaverðast við starfið er að verkefni mín hafa bein áhrif á daglegt líf fólks enda skipta samgöngur gríðarlegu máli fyrir samfélagið,“ segir Páll Birgir sem tók við starfi deildarstjóra þjónustudeildar á Austursvæði Vegagerðarinnar í desember síðastliðnum.

Helstu verkefni hans felast í því að hafa umsjón með starfsemi þeirra þriggja þjónustustöðva sem tilheyra Austursvæði, á Höfn, Reyðarfirði og í Fellabæ auk vélaverkstæðis á Reyðarfirði. Starfsmannamál, skipulagning, áætlanagerð og kostnaðareftirlit eru viðamikil en auk þess heldur Páll Birgir utan um fjölmörg verkefni. En hvernig er hefðbundinn vinnudagur? „Dagarnir eru mjög oft ófyrirsjáanlegir. Maður byrjar kannski með ákveðna áætlun en svo tekur dagurinn bara einhverja allt aðra stefnu. Slæm veðurspá kallar á undirbúning vetrarþjónustu og jafnvel lokun vega, þá geta bilanir í búnaði og fleiri óvænt atvik krafist tafarlausrar athygli manns,“ lýsir Páll Birgir brosandi. „Verkefnin eru því mjög fjölbreytt og skemmtileg.“

Tölvurnar heilluðu

Páll Birgir er fæddur og upp alinn á Höfn í Hornafirði og föðurættin á rætur að rekja austur á land. Hann minnist þess með hlýju að hafa alist upp í litlu og frjálslegu samfélagi á Höfn en átján ára fluttist hann til Reykjavíkur til að klára stúdentspróf við Menntaskólann í Hamrahlíð. Þá lá leiðin í Háskólann í Reykjavík að læra tölvunarfræði. „Á þessum tíma var mikil uppsveifla í tölvumálum og ég hafði mikinn áhuga á þeim. Svo voru nokkrir félagar sem voru líka í þessu námi þannig að þetta lá beint við,“ segir hann glaðlega en námið í HR átti mjög vel við hann. „Þetta var mjög praktískt nám og félagslífið líflegt.“

Úr bankageiranum í álið fyrir austan

Eftir námið fékk hann vinnu hjá Fakta, litlu hugbúnaðarfyrirtæki, þar sem hann starfaði sem forritari og sinnti þjónustu við viðskiptavini. „Árið 2006, í góðærinu, fór ég eins og svo margir í bankageirann og var að vinna hjá KB banka í eitt ár,“ segir Páll Birgir sem kynntist á þessum tíma eiginkonu sinni Ingunni Eir Andrésdóttur.

„Við kynntumst nú eins og margir á skemmtanalífinu en svo skemmtilega vildi til að við bjuggum nánast í næstu götu hvort við annað í Breiðholtinu,“ segir Páll en Ingunn er frá Eskifirði. Ingunn gekk með fyrsta barn þeirra árið 2007 og þá fór parið að velta fyrir sér framtíðarheimili. „Við skoðuðum ýmsa kosti. Íbúðaverð í Reykjavík var mjög hátt og þá vaknaði þessi hugmynd, af hverju ekki að flytja austur? Þar var ódýrara húsnæði og gott stuðningsnet frá fjölskyldu Ingunnar. Á þessum tíma var líka mikill uppgangur fyrir austan enda verið að klára byggingu álversins og framleiðsla að fara í gang,“ segir Páll sem fékk vinnu í álverinu og flutti með fjölskylduna á Eskifjörð þar sem þau hafa búið síðan.

Frá tölvum yfir í alþjóðlegt samstarf

Þó Páll hafi unnið hjá álverinu í rúm átján ár hefur hann sinnt mismunandi störfum. „Ég byrjaði í tölvudeildinni og var þar í tíu ár við rekstur og þróun framleiðslukerfa verksmiðjunnar. Síðan bauðst mér að færa mig yfir til móðurfyrirtækis Alcoa og í nokkur ár starfaði ég í alþjóðlegu teymi við þróun framleiðslukerfa fyrir steypuskála álvera fyrirtækisins víða um heim.“ Páll var einn frá Íslandi en aðrir í teyminu voru í Bandaríkjunum, Kanada og víðar. Starfið kallaði á nokkur ferðalög en þau urðu töluvert minni en ætlunin var vegna COVID-19.

„Eftir nokkur ár færði ég mig aftur til Fjarðaráls þar sem ég vann við verkefnastjórn fjárfestingaverkefna næstu þrjú árin.“

Mikilvægt samfélagslegt gildi

„Eftir svo langan tíma hjá Alcoa fann ég að ég þurfti að breyta til og spreyta mig á einhverju öðru,“ svarar Páll þegar hann er spurður af hverju hann hafi sótt um hjá Vegagerðinni. „Síðan sá ég að Vegagerðin auglýsti þessa deildarstjórastöðu og ég hugsaði með mér, af hverju ekki?“ Hann segir að starfið hafi heillað hann helst vegna þess að verkefnin snertu samfélagslega mikilvæga innviði. „Samgöngur skipta fólk svo miklu máli, ekki síst hér á Austurlandi,“ lýsir Páll sem byrjaði í starfinu 1. desember síðastliðinn.

Ýmsar áskoranir á Austursvæði

Páll segir að verkefnin á Austursvæði Vegagerðarinnar geti verið krefjandi fyrir þjónustudeildina, sérstaklega yfir vetrartímann. „Við erum með fjallvegi og heiðar sem getur verið krefjandi að þjónusta á veturna, til dæmis Fagradal, Fjarðarheiði, Möðrudalsöræfi og Vatnsskarð eystra.“ Hann bætir við að á sunnanverðu svæðinu geti orðið mjög vindasamt sem valdi bæði skemmdum á vegum og búnaði auk þess sem stundum þurfi að grípa til lokana á vegum. Þá sjái Vegagerðin um rekstur þriggja vegganga á svæðinu.

Takmarkað fjármagn er líka áskorun. „Við viljum þjónusta vegakerfið eins vel og hægt er en okkur er settur viss rammi sem við þurfum að halda okkur innan. Við getum því ekki alltaf gert eins mikið og okkur langar. En við gerum eins vel og hægt er.“

Páll hrósar samstarfsfólki sínu. „Ég er mjög ánægður með samstarfsfólkið mitt. Allir hér hafa hag samfélagsins að leiðarljósi og leggja sig fram um að tryggja að samgöngur gangi sem greiðast.“

Gott að búa á Eskifirði

Páll og Ingunn eiga þrjú börn, tvo syni og eina dóttur. Páll segir mjög gott fyrir fjölskyldufólk að búa á Eskifirði. „Þetta er lítið og barnvænt samfélag. Hér búa um þúsund manns og stutt í skóla og umferð lítil,“ lýsir Páll sem sjálfur nýtir sér almenningssamgöngur til að komast til og frá vinnu. „Það tekur mig ekki nema korter að fara í vinnuna á Reyðarfirði, það er ótrúlega þægilegt að hoppa bara upp í rútu og láta aka sér í vinnuna,“ segir hann brosandi.

Eðlilegt að fólk hafi skoðanir á samgöngumálum

Samgöngumál snerta daglegt líf fólks og margir hafa á þeim sterkar skoðanir. Páll segir það einfaldlega hluta af starfinu að hlusta og meðtaka þær skoðanir og ekki síst tilfinningar fólks í þessum málum. „Allir treysta á samgöngur og hér fyrir austan eru ýmis stór mál í umræðunni þessa dagana eins og t.d. Fjarðarheiðin, Fagridalurinn, ófærð og veggöng.“

Hann hlakkar til að takast á við þá áskorun sem felst í að þjónusta vegakerfi landsins. „Þetta er mjög fjölbreyttur og lifandi vinnustaður,“ segir Páll. „Það er góð tilfinning að vita að vinnan manns snýst um eitthvað sem skiptir raunverulega máli fyrir daglegt líf fólks.“

Kolbrún Stella Indriðadóttir

Hvað hefur þú unnið lengi hjá Vegagerðinni?

Ég byrjaði núna í byrjun mars á þessu ári, svo ég er bara nýbyrjuð.

Í hverju felst starfið og hvernig er dæmigerður vinnudagur?

Verkefni þjónustustöðvarinnar eru árstíðabundin en felast í rekstri, viðhaldi og þjónustu við samgöngukerfi svæðisins en stór hluti vega á svæðinu er malarvegir. Þau verkefni sem ég hef komið að fyrstu vikurnar í starfi eru helst daglegt eftirlit með ástandi vega, viðhald slitlaga eins og holufyllingar og svo hefur einnig verið mikið um leysingar og vatn flætt yfir vegi. Stærstu verkefnin þessi misserin eru snjómokstur, hálkuvarnir, vöktun veðurs og færðar og viðbrögð við ófærð eins og lokun Holtavörðuheiðar. Ég hef átt í samskiptum við marga verktaka sem vinna að þessu á svæðinu, sem og samvinnu við vaktstöð Vegagerðarinnar og auðvitað starfsmenn þjónustustöðvarinnar á Hvammstanga. Ég verð að viðurkenna að Holtavörðuheiðin átti hug minn allan í nýliðnum mars, enda veðrið og færðin með þeim hætti. Annars er ég mjög heppin með starfsmennina á Hvammstanga sem kunna vel á hlutina og koma mér inn í þetta í rólegheitum.

Hvað gerðir þú áður en þú komst til starfa hjá Vegagerðinni?

Ég vann í Landsbankanum sem fjármálaráðgjafi.

Hvað er skemmtilegast við starfið?

Þar sem mig langaði að breyta til og skipta um starfsvettvang er ótrúlega gaman að fá tækifæri til að takast á við ný og spennandi verkefni hjá Vegagerðinni og læra heilmargt nýtt í leiðinni.

Hvað er mest krefjandi við starfið?

Það er í raun það sama og er skemmtilegast við starfið, ný viðfangsefni og hugtök sem ég hef ekki áður sýslað með.

Hver eru þín helstu áhugamál?

Ég hef mikinn áhuga á allri hestamennsku, ræktun, útreiðum og keppni. Við maðurinn minn eigum 35 hross og 125 vetrarfóðraðar kindur en við búum á jörðinni Lindarbergi sem er 2 km norðan við Hvammstanga eða við hinn fræga Vatnsnesveg 711. Svo sveitin er lífið fyrir utan vinnuna.

Jökull sumarstarfsmaður

Af hverju sóttir þú um sumarstarf hjá Vegagerðinni?

Mér fannst mjög spennandi að fá tækifæri til að vinna með landfræðilegar upplýsingar, þar sem það tengist námi mínu mikið.

Hver eru verkefnin þín?

Aðal verkefnið mitt er að skrá inn vegtengingar við stofnvegi inn í kortasjá til ársins 2020. Það felst í því að skoða umsagnir, pósta og deiliskipulög og finna út hvaða tengingar er búið að samþykkja og hafna. Næsta verkefni mitt er að skrá allar vegtengingar náttúru Íslands við stofnvegi. Síðasta verkefni mitt verður að taka saman alla framtíðarvegi sem á eftir að byggja sem eru í aðalskipulagi sveitarfélaga.

Hvernig líst þér á vinnuna og vinnustaðinn?

Mér líst mjög  vel á vinnuna og mér finnst mjög áhugavert að sjá hvað það er mikið til af gögnum hjá Vegagerðinni. Það er nýtt fyrir mér að takast á við svona stór verkefni þar sem tímabilin eru mörg ár en einstaklega skemmtilegt að sjá það koma saman. Mér líður líka mjög vel hér í miðstöð þar sem fólkið á þróunarsviðinu hefur tekið mjög vel á móti mér.

Hvert stefnir þú í framtíðinni?

Eins og er stefni ég á mastersnám sem er með áherslu á landfræðilegar upplýsingar. Hvort það verði landfræði, skipulagsfræði eða eitthvað annað kemur í ljós.

Cecilía Þórðardóttir

Hvað hefur þú unnið lengi hjá Vegagerðinni?

„Ég byrjaði hjá Vegagerðinni í janúar á þessu ári. Það eru mörg spennandi verkefni í gangi hjá Vegagerðinni, sérstaklega í tengslum við Samgöngusáttmálann. Eftir að hafa unnið í 10 ár sem ráðgjafi í samgönguskipulagi á Englandi finnst mér gaman að koma heim og taka þátt í þeirri uppbyggingu sem nú er í gangi á Höfuðborgarsvæði Vegagerðarinnar.

Hvað gerðir þú áður en þú komst til starfa hjá Vegagerðinni? 

„Eftir flutning til London tók ég mastersgráðu í samgöngum, sem var kennd sameiginlega við bæði Imperial College og University College London. Að lokinni útskrift hóf ég störf sem ráðgjafi í samgönguskipulagi og vann síðast hjá fyrirtæki sem heitir Velocity Transport Planning áður en ég kom til Vegagerðarinnar. Helstu verkefni fólust í að styðja umsóknir fyrir deiliskipulag. Í því fólst m.a. að útbúa samgöngumat, herma gatnamót og vera í samskiptum við opinbera hagaðila eins og Highways England, Transport for London og sýslur, t.d. Kent og Essex, varðandi innihald samgöngumats og hönnun aðgengis að reit fyrir gangandi, hjólandi og bíla og jafnvel almenningssamgöngur, ásamt mótvægisaðgerðum utan reits.“

Í hverju felst starfið þitt?

„Starfið er fjölbreytt og skemmtilegt. Ég hef komið að verkefnum tengdum öryggismálum, umferðarflæði og skipulagi síðan ég byrjaði hjá Vegagerðinni.“

Hvernig er hefðbundinn vinnudagur hjá þér?

„Hefðbundinn vinnudagur felur í sér einhverja fundi tengda verkefnum sem ég er í, þá ýmist innanhúss, með ráðgjöfum eða sveitarfélögum. Ég er mikið að skoða umferðarflæði og ferðatíma, ásamt því að skoða gögn tengd skipulagi á annað hvort nýjum reitum eða breytingum.“

Hvað er skemmtilegast?

„Ég hef endalausan áhuga á öllu tengdu samgöngum og því er erfitt að finna eitthvað eitt sem er skemmtilegast. Mér finnst mjög gaman að geta notað bakgrunn minn í skipulagi til að koma að umsögnum Vegagerðarinnar fyrir skipulagsvinnu á Höfuðborgarsvæðinu. Svo er ég mikið gagnanörd. Mér finnst mjög gaman að lesa í tölulegar upplýsingar sem við höfum og nýta þær til að bæta samgöngur fyrir alla. Ég er mjög spennt fyrir verkefni sem er að fara af stað í september þar sem við komum til með að telja umferð við 16 gatnamót á Sæbraut og Miklubraut/Hringbraut í Reykjavík. Þetta gefur okkur dýrmætar upplýsingar um ferðahegðun fólks á þessum svæðum sem við getum vonandi notað til að bæta ferðatíma allra á næstunni.“

Hvað er mest krefjandi við starfið?

„Eins og staðan er núna er ég enn þá að kynnast bæði samstarfsfélögum hjá Vegagerðinni og okkar kollegum hjá sveitarfélögunum. Þetta er mikilvægur þáttur í starfinu til að tryggja að ég geti komið verkefnum í réttan farveg  og að upplýsingar rati til viðeigandi aðila.“

Hvað gerir þú utan vinnu?

„Þá ver ég tíma með manni og barni, ásamt því að hitta vini. Þar sem maðurinn minn er spænskur þá ferðumst við töluvert til norður Spánar og verjum tíma með stórfjölskyldunni og leyfum dóttur okkar að æfa spænskuna á frænkum og frændum.“

Haukur Árni Hermannsson

Hvernig er hefðbundinn vinnudagur?
Hefðbundinn vinnudagur hjá okkur er varla til. Við reynum að vinna samkvæmt áætlunum hjá okkur en það koma oft breytur inn í dæmið sem setja áætlunina alveg á hvolf. Á vetrum geta vinnudagarnir byrjað upp úr klukkan fimm og staðið langt fram á kvöld þegar veðrið er með vesen.Símtölin verða stundum það mörg á slíkum dögum að ég hef ekki nennt að telja þau og síminn grátbeðið um hleðslu nokkrum sinnum yfir daginn. Sumrin geta líka verið strembin á köflum, pressa við að skipuleggja verkefnin þannig að þau passi saman. Eitt þarf að klárast svo hægt sé að byrja á því næsta o.s.frv.

Hvað er mest krefjandi við starfið?
Að standast og uppfylla þær kröfur og væntingar sem gerðar eru til okkar. Bæði kröfur sem Vegagerðin gerir til starfsmanna sinna, til dæmis að fara ekki fram úr fjárveitingum, og líka þær sem almenningur gerir til okkar. Það vilja allir fá þjónustu sem fyrst og það á auðvitað að vera vel gert. Það vilja allir fá sína vegi mokaða að vetri eða heflaða að sumri sem fyrst og enginn sáttur við að þurfa að bíða, eðlilega.

Hvað er skemmtilegast við vinnuna?
Kynnast nýju fólki, bæði samstarfsfólki og öðrum. Ég hef samanburðinn úr lögreglunni, þar kynntist ég helling af fólki en færri kynnin komu til af góðu, merkilegt nokk. Hérna er þetta allt öðruvísi sem betur fer. Samskiptin almennt eru mun jákvæðari þó auðvitað komi eitt og eitt neikvæðara tilvik. Það er frábært að geta orðið við óskum almennings um aðstoð Vegagerðarinnar og þannig „greitt götu þeirra“ í alls konar skilningi þessa orðalags. Svo er líka mjög skemmtilegt hvað vinnan er fjölbreytt. Maður fær eiginlega ekki tíma eða tækifæri til að fá leið á tilteknu verkefni, það næst ekki að sinna því nógu lengi
því það er annað verkefni tekið við.

Hver eru þín áhugamál?
Klassískt svar – fjölskyldan, elta krakkana á fótboltamót,útilegur og sumarbústaðaferðir. Svo væri hægt að nefna skotveiði þó henni hafi verið lítið sinnt undanfarið. Og líkaflest sem tengist sveitinni og vinnunni þar

Sveinfríður Högnadóttir

Hvað hefur þú unnið lengi hjá Vegagerðinni?
Ég byrjaði að vinna hjá Vegagerðinni árið 2006 því mig langaði að prufa eitthvað nýtt.

Í hverju felst starfið þitt?
Starfið er mjög fjölbreytt en mesti tíminn fer í að leiðbeina vegfarendum um færð og ástand á þjóðvegakerfi landsins. Við sjáum um að koma upplýsingum um færð og aðstæður á vefinn, umferdin.is. Einnig sjáum við um skiptiborð og reynum eftir bestu getu að koma símtölum áfram þegar viðmælandi veit ekki við hvern hann vill tala og ekki heldur hvað hann gerir, stundum er bara beðið um þennan rauðhærða með skeggið.

Hvað gerðir þú áður en þú komst til starfa hjá Vegagerðinni?
Ég starfaði sem ritari hjá Menntaskólanum á Ísafirðiáður en ég kom til Vegagerðarinnar. Eins og flestir unglingar í sjávarþorpi úti á landi vann ég við fiskinn með skólanum. Um tíma var ég kokkur á Hótel Ísafirði en lengst af hef ég unnið skrifstofustörf. Ég lauk stúdentsprófi frá Menntaskólanum á Ísafirði og svo hef ég verið að taka hina og þessa áfanga, til dæmis lauk ég undirbúningsnámi í bókasafns- og upplýsingafræði.

Hvernig er hefðbundinn vinnudagur hjá þér?
Það er erfitt að segja hvernig hefðbundinn vinnudagur er, en það fer eftir því hvernig veðrið er og hvaða tímiársins. Starfið er mjög árstíðabundið. Á veturna erumvið aðallega að svara fyrir um færð og veður en ásumrin erum við meira að svara ferðafólki sem er að spyrja um leiðir á hálendinu. Svo er mikið að gera í kringum opnanir á hálendinu.

Hvað er skemmtilegast við starfið?
Ég er mjög heppin með samstarfsfólk sem gerir vinnuna yfirleitt mjög skemmtilega. Fjölbreytileikinn er skemmtilegasti hluti starfsins, það má segja að engin tvö símtöl séu eins, þó svo að þar séu undantekningar á þegar vegir eru lokaðir. Þá kemur fyrir að við hljómum eins og biluð plata þegar við verðum að svara: „Nei, því miður er engin tímasetning komin um hvenær vegurinn opnast á ný.“

Hvað er mest krefjandi við starfið?
Það er þegar fólkið sem hringir er í erfiðum aðstæðum, svo sem fast uppi á heiði eða úti í á. Þá væri stundum gott að vera sálfræðimenntaður. Einnig er mjög krefjandi að róa fólk sem er reitt út í okkur og ekki er alltaf hægt að endurtaka það sem sagt er, en þá er bara að setja upp rólegu röddina og hlusta þar til það hefur fengið að blása aðeins.

Hvað gerir þú utan vinnu?
Að vera með fjölskyldunni sem fer stækkandi með hverju árinu, sem betur fer, er alltaf það sem tekur mestan tíma og er skemmtilegast. Þar fyrir utan er ég mikið að prjóna og lesa. Útivera, sund og ferðalög eru einnig hluti af því sem ég geri fyrir utan vinnu.